د طالبانو د کورنیو چارو وزارت مرستیال، محمد نبي عمري له خپلو امارتي غړو وغوښتل چې د عمومي عفوې له فرمان وروسته دې له غچ اخیستلو ډډه وکړي او غچ اخیستل یې حرام عمل بللي دي.
عمري په پکتیکا کې یوې غونډې ته د دوی د عفوې له فرمانه د ځينو سرغړوونکو د محاکمه کېدو خبر هم ورکړی دی.
نبي عمري وویل: “چې عفوه وشوه، له عفوې وروسته مجاهده او ډلګی مشره چې ته له چا غچ اخلې، دا د الله ج او د هغه د رسول ص او د خپلو آمرینو له امره سرغړونه کوې. نو ډډه ترې وکړه.”
د راپورونو پر بنسټ، طالبان وخت ناوخته پخواني امنیتي سرتېري نیسي، قوماندانیو ته یې لېږدوي او بایومټریک کوي او په ځینو مواردو کې، د سیمې د ځینو خلکو، ملکانو یا امامانو له لوري شخصي عقدې د دې لامل کېږي چې پخواني سرتېري طالبانو ته بد معرفي شي او بندیان شي.
د بشري حقونو بېلابېلو بنسټونو او رسنیو په تېرو کلونو کې د پخوانیو امنیتي ځواکونو د نیولو، شکنجې، ورکېدو او ناڅاپي وژنو په اړه ژورې اندېښنې څرګندې کړې دي.
بلخوا، په افغانستان کې د ملګرو ملتونو مرستندویه پلاوي (یوناما) په خپل وروستي راپور کې په دغه هېواد کې د بشري حقونو پر دوامدارو سرغړونو، خپلسریو نیونو، ګواښونو او پر ښځو او رسنیو پر لګول شویو محدودیتونو اندېښنه ښودلې ده.
یوناما په خپل راپور کې ویلي چې د روان زیږدیز کال له جولای تر سپټمبر میاشتې پورې یې په افغانستان کې د پخواني جمهوري نظام د ۴ امنیتي سرتېرو وژنه ثبت کړې ده.
راپور ښيي چې پر ښځو، رسنیو، پخوانیو دولتي کارکوونکو او مذهبي لږکیو محدودیتونه او د بشري حقونو سرغړونې لا هم دوام لري.
د طالبانو حکومت چارواکو او ویاندویانو د یوناما دا راپور رد کړی او هغه یې له واقعیتونو لرې بللی دی.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
