په افغانستان کې د پاکستان پخوانی سفیر او د افغانستان لپاره د پاکستان اوسنی ځانګړی استازی محمد صادق وايي، په افغانستان کې شاوخوا د ۲۰ هېوادونو ترهګر مېشت دي چې نه یوازې د سیمې هېوادونو، بلکې نړیوالې ټولنې ته هم ګواښ پېښوي.
هغه دغه څرګندونې د استرالیا د ترهګرۍ ضد برخې له سفیرې، مېرمن ګېما هاګینز سره د لیدنې پر مهال کړي.
صادق په دې غونډه کې د افغانستان د امنیتي وضعیت او په دغه هېواد کې د مېشتو ترهګرو ډلو په اړه خبرې کړې دي.
محمد صادق د غويي ۲۲مه په خپله اېکسپاڼه لیکلي، په دې لیدنه کې دواړو لورو په افغانستان کې د شاوخوا ۲۰ هېوادونو اړوند د ترهګرو ډلو د موجودویت په اړه خبرې کړي چې به خبره یې دغه ډلې نه یوازې د سیمې هېوادونو، بلکې نړیوالې ټولنې ته هم ګواښ پېښوي.
نوموړي د استرالیا له حکومت څخه د هغې وروستۍ پرېکړې له امله هم مننه کړې چې د بلوچستان د ازادۍ پوځ (بياېلاې) یې د ترهګرې ډلې په توګه اعلان کړی دی.
په همدې حال کې د پاکستان د کورنیو چارو پخواني وزیر او د اوسني لومړي وزیر سیاسي سلاکار، رانا ثناالله د دغه هېواد په سنا یا مشرانو جرګه کې ویلي، له ۷ تر ۸زرو بېلارې شوي کسان په افغانستان کې له ترهګریزې روزنې ترلاسه کولو وروسته په پاکستان کې بریدونه کوي چې دغه چاره د هند او اسراییل په ملاتړ کېږي.
ثناالله وویل: “لومړي وزیر شهباز شریف روښانه کړې چې افغانستان باید د پاکستان او ترهګرۍ تر منځ یو انتخاب کړي.”
نوموړی وايي، پاکستان به تر هغه وخته پورې په افغانستان کې د ترهګرو د روزنیزو کمپونو او پټنځایونو په نښه کولو ته دوام ورکړي څو دا وبا له منځه ولاړه شي.
پاکستان پر افغانستان د طالبانو د بیا واکمنېدو راوروسته دا تور لګوي چې د افغانستان خاوره د پاکستان پرضد د ترهګرۍ لپاره کارو کېږي، خو طالبان د پاکستان دغه تور ردوي او وايي، پاکستان کې ناامني د دغه هېواد کورنۍ ستونزه ده.
اخوا طالبانو په ځلونو سره افغانستان کې د ترهګرو ډلو فعالیت او حضور رد کړی او دا یې ویلي چې د افغانستان خاوره به هېڅکه د نورو هېوادونو پر وړاندې ونهکارول شي او همداراز یې دعا کړې چې داعش په پاکستان کې پټنځایونه لري او له پاکستان څخه یې غوښتي چې پر وړاندې یې اقدام وکړي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
