د طالبانو د اطلاعاتو او کلتور وزارت ویاند وايي، په ټول افغانستان کې د بيبيسي شبکې فعالیتونه د دې رسنۍ د پرلهپسې سرغړونو له امله درول شوي دي.
حبیب غفران دا موضوع په یوه غږیز پیغام کې اعلان کړه چې د افغانستان ملي راډیو او ټلوېزیون له خوا خپور شوی، خو په دې اړه یې نور جزئیات وړاندې نه کړل.
بيبيسي دري څو ساعته مخکې په ټولنیزو رسنیو کې لیکلي وو چې طالبانو د بيبيسي راډیو خپرونې پر اېفاېم څپو ځنډولې دي، خو اورېدونکي لا هم کولای شي چې د راډیو خپرونې د لنډو او منځنیو څپو له لارې واوري.
بيبيسي ویلي چې د دې ستونزې د حل لپاره له طالبانو سره په خبرو بوخت دي.
دې شبکې په یوه اعلامیه کې ویلي: “په ټول افغانستان کې میلیونونه کسان د کره خبرونو او معلوماتو د ترلاسه کولو لپاره پر بيبيسي تکیه کوي، او موږ د دې ستونزې د حل لپاره له چارواکو سره په خبرو بوخت یو.”
تر اوسه د دې نړیوالې رسنۍ د هغو ادعا شویو سرغړونو په اړه څه نه دي ویل شوي چې د طالبانو له خوا یې یادونه شوې ده.
طالبانو په افغانستان کې پر رسنیو سخت محدودیتونه لګولي دي، چې له امله یې دغه هېواد د مطبوعاتو د ازادۍ له پلوه د نړۍ له تر ټولو تړلو هېوادونو څخه ګرځېدلی دی.
بيبيسي له هغو لږو نړیوالو رسنیو څخه ده چې په کابل کې فعالیت کوي او د هېواد په بېلابېلو ولایتونو کې د طالبانو له چارواکو سره مرکې کوي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
