په پاکستان کې د طالبانو د لومړۍ واکمنۍ پرمهال د دې ډلې پخواني سفیر، ملاعبدالسلام ضعیف پر افغانستان د پاکستان هوايي بریدونو ته غبرګون وښود.
هغه پر خپل ایکس پاڼه لیکلي، دفاع فرض ده، خو وايي، د سر په قربانيو نه، بلکې په علم او تکنالوژي کېږي.
ضعیف وویل: “د اسلامي هېواد د حدودو څخه دفاع فرض عین ده، مګر دا دفاع اوس د سر په قرنبانیو نه کېږي، علم، تکنالوژي او اسباب غواړي، وچه ډوډئ وخورﺉ، په پښو تګ وکړﺉ، مصارف خرچه او معاشونه کم کړﺉ، خو د دفاع لپاره یو څه پیدا یا جوړ کړﺉ.”
ملاضعیف زیاتوي، په عذر او غندلو نه د فرضیت څخه ذمه فارغېږي او نه د قسم خوړلي دښمن سترګې سوځي.
پاکستان د اطلاعاتو وزارت نن سهار ادعا کړې چې د غضب للحق عملیاتو پر دوام یې د افغانستان دننه د تحریک طالبان پاکستان (ټيټيپي) او بلوڅ وسلهوالو ډلو پر پټنځایونو هوايي بریدونه کړي دي.
د وزارت په خبرپاڼه کې راغلي، دا بریدونه د کره استخباراتي معلوماتو پربنسټ شوي او د افغانستان په دوو بېلابېلو سیمو کې هغه مرکزونه په نښه شوي چې د ټيټيپي، بلوڅ وسلهوالو ډلو او د هغوی د متحدانو له لوري د پټنځایونو او عملیاتي مرکزونو په توګه کارېدل.
خبرپاڼه زیاتوي، په دې بریدونو کې ۲۲ وسلهوال وژل شوي او د وسلو او مهماتو لویې زېرمې هم لهمنځه وړل شوې او ادعا یې چې دغه بریدونه په کره ډول ترسره شوي او د ملکي تلفاتو د مخنیوي لپاره پهکې احتیاطي تدابیر نیول شوي دي.
خو دا په داسې حال کې ده چې د طالبانو ویاند ذبیحالله مجاهد وړاندې ویلي چې پاکستاني الوتکو د کونړ ولایت د شلتن ولسوالۍ د چوګام سیمه او د هلمند ولایت د ګرمسیر ولسوالۍ د صفار سیمه بمبار کړې ده.
مجاهد ویلي، په دغه بریدونو کې د ښځو او ماشومانو په ګډون نهه ملکي وګړي وژل شوي، ۱۱ ټپیان شوي او درې کورونه نړېدلي دي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
