په بلخ کې د طالب وسلهوالو رسنیز دفتر وايي، د دغه ولایت د والي، یوسف وفا د ملا هبتالله د اوامرو پر پلي کېدو ټینګار کړی دی.
وفا دغه څرګندونې په سرپل ولایت کې د شمال لوېدیځ زون د پنځو ولایتونو والیانو، امنیه قوماندانانو او نورو چارواکو د همغږۍ ناسته کې کړي دي.
په دې ناسته کې چې تېره ورځ شوې د طالبانو د مشر د فرمانونو پر پلي کېدو او د امنیتي مسایلو په اړه پهکې خبرې شوي دي.
وفا په دې ناسته کې له ټولو چارواکو وغوښتل چې د هبتالله اخندزاده امرونه لومړی پر ځان او بیا پر خپل لاس لاندې کسانو پلي کړي.
هغه د جوماتونو له ملا امامانو او د مدرسو له مدیرانو وغوښتل چې خلک د طالبانو له مشر سره بیعت کولو ته وهڅوي.
په دې غونډه کې د طالبانو د سرپل، جوزجان، سمنګان، فاریاب او بلخ ولایتونو چارواکو پرېکړه کړې چې د تېر جمهوري نظام ټول قوانین لغوه دي او یوازې به د طالبانو قوانین پلي کېږي.
په دې غونډه کې طالب چارواکو ته لارښوونه شوې چې د دوی د حکومت پر وړاندې د منفي تبلیغاتو مخه دې په کلکه ونیول شي.
طالب وسلهوالو خبرداری ورکړی، هر څوک چې د ممبر، رسنیو یا عامو مجلسونو له لارې د دوی پر ضد تبلیغات وکړي، نظامي محکمې ته به معرفي شي.
د غونډې په نورو برخو کې چارواکو له افغانستان څخه بهر د جهاد په نوم د تګ او له نورو ډلو سره د یوځای کېدو پر مخنیوي هم ټینګار کړی او ویې، چې دا کار د دوی د مشر له اجازې پرته جواز نه لري.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
