د بدخشان لپاره د طالبانو والي، رحمتالله نجیب د دوی رژيم پر وړاندې د مخالفو ډلو فعاليتونه مجهول او بېګټې وبلل.
نجیب وايي: “د نظام د مخالفو ډلو فعالیتونه مجهول او بېګټې دي. اسلامي امارت یو اسلامي او عقیدتي نظام دی او د هغه پر وړاندې درېدل ناجایز دي.”
ياد والي دغه څرګندونې د یو روزنیز سیمینار د پای ته رسېدو په مراسمو کې وکړې۔
هغه په دې غونډه کې له طالب ځواکونو وغوښتل چې خپلې دندې په اخلاص ترسره کړي.
طالبانو د واک ته رسېدو په لومړیو کې عامه بخښنه اعلان کړه، خو د خپلو مخالفینو سیاسي فعالیتونه نه مني او هغوی ته په کور دننه د فعالیت اجازه نه ورکوي.
خو دغو مخالفینو اوسمهال د افغانستان په بېلابېلو ولایتونو کې د طالبانو پرضد عملياتونه کوي.
وړمه ورځ ملګرو ملتونو د طالبانو پرضد د مخالفو جبهو د عملیاتو شمېرې خپرې کړې.
د ملګرو ملتونو سرمنشي انټونیو ګوټرېش د امنیت شورا ته په خپل تازه راپور کې ویلي چې د مې له لومړۍ نېټې د جولای تر وروستۍ نېټې پورې، د طالبانو وسلهوالو مخالفو ډلو د افغانستان په ۲۱ ولایتونو کې د ۸۸ بریدونو مسوولیت منلی دی.
په دغو بریدونو کې د افغانستان ازادۍ جبهه، ملي مقاومت جبهه، شنې قطعې، میهن سپاهي جبهه، متحده جبهه او یو شمېر نورې ډلې شاملې دي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
