د امریکا د دفاع پخواني وزیر ویلي٬ طالبانو ته د افغانستان د کنټرول بیا سپارل وحشتناکه تېروتنه ده.
لیون پنیټا چې مخکې د سي آی اې مشر هم پاتې شوی، وايي، امریکا باید په افغانستان کې خپل حضور ساتلی وای او ده د دې هېواد وضعیت ډېر غمجن پای وباله.
یاد پخوانی امریکايي چارواکي سکای نیوز سره په مرکه وویل: “له افغانستانه د ټولو امریکايي ځواکونو ناڅاپي وتل او دغه هېواد یوځل بیا طالبانو ته پرېښودل، له هغو ټولو کسانو سره د خیانت په معنا وو چې د امریکا لپاره یې جګړه کړې وه.”
لیون پنیټا زیاته کړه چې امریکاد افغانانو پر وړاندې مسوولیت درلود چې له هغوی سره خپلو همکاریو ته دوام ورکړي او د هغوی د ژوند د ښه کېدو لپاره هڅې وکړي.
د نوموړي په خبره: “ما احساس کاوه چې امریکا په افغانستان کې په ډېرو برخو کې مهم او مثبت کارونه کړي دي. امریکا په افغانستان کې د پوځ او استخباراتي جوړښتونو په جوړولو کې مرسته کړې وه. امریکا هڅه کوله له ترهګرو او طالبانو سره مبارزه وکړي او د افغانانو لپاره د ښه ژوند زمینه برابره کړي، ځوانو ښځو ته زدهکړې ور کړي او د کاروبارونو د فعالیت لپاره زمینه مساعده کړي.”
هغه ټینګار وکړ، که څه هم د افغانستان جګړه اوږده شوې وه، خو امریکا باید په دغه هېواد کې خپل حضور ساتلی وای.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
