د طالبانو ویاند، ذبیحالله مجاهد وايي، د افغانستان د مخکېني دولت پر وړاندې د جګړې پر مهال د دوی یوې رسنیزې شبکې د “ذبیحالله مجاهد” په نوم فعالیت کاوه.
هغه وویل، د تېر دولت پرمهال د تعقیب له وېرې دې شبکې فعاليت کاوه او قاري یوسف احمدي هم د ذبیحالله مجاهد له نوم استفاده کوله.
مجاهد دغه راز څو ورځې مخکې افشا کړې چې اصلي نوم یې طاهرشاه صدیقي دی.
نوموړي ویلي چې دا موضوع یې د تېر دولت لهخوا تر نیول کېدو وروسته د څېړنو پر مهال هم مطرح کړې وه.
د هغه په وینا، د څو کسانو لهخوا د ذبیحالله مجاهد نوم د کارولو له موخو څخه یوه دا وه چې د هغه مهال د افغانستان دولتي ځواکونو لهخوا د طالبانو د ویاندویانو د نیول کېدو مخه ونیول شي.
ذبیحالله مجاهد د طالبانو د رسنیز او تبلیغاتي سېسټم یو له خورا پېژندل شویو څېرو څخه ګڼل کېږي او ده له دې مخکې کلونه د یوې ناڅرګندې او پټې څېرې په توګه یوازې د ټېلیفون، برېښنالیک او ټویټر (اوسنی ایکس) له لارې له رسنیو سره په اړیکه کې و، خو د ۲۰۲۱ کال د اګسټ په میاشت کې په کابل کې په خپل لومړي رسمي خبري کنفرانس کې د کامرو مخې ته راښکاره شو.
هغه له ۲۰۰۷ کال راهیسې او د پخواني ویاند محمد حنیف له نیول کېدو وروسته د طالبانو د رسمي ویاند په توګه دنده پیل کړې ده.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
