راپورونه وايي، د طالبانو عدلیې وزیر، عبدالحکیم شرعي د شمشاد خصوصي ټلوېزیون مسوولانو ته ویلي، د ټلوېزیون ودانۍ دولتي ده او دوی ته یې وسپاري.
عبدالحکیم شرعي د شمشاد ټلوېزیون پر بنسټګر، فضل کریم فضل فشار راوړی څو ودانۍ تخلیه کړي.
ورته مهال په شمشاد ټلوېزیون کې سرچینو وویل، څه موده کېږي د ټلوېزیون ودانۍ ځینې برخې د طالبانو کابل ښاروالۍ ته سپارل شوې دي.
د طالبانو د عدلیې وزیر د شمشاد ټلوېزیون یوه دروازه او په دې ځمکه کې جوړ شوي دوکانونه بند کړي دي.
د ټلوېزیون ودانۍ په تېر جمهوریت کې د عمر ماین پاکۍ موسسې ته په ۳۰ کاله قرارداد ور کړل شوې وه، خو فضل کریم فضل د ودانۍ دننه ټلوېزیون او په وروستیو کلونو کې یو مارکېټ هم جوړ کړی و.
د عمر ماین پاکۍ موسسې مشر، چې د شمشاد ټلوېزیون بنسټګر فضل کریم فضل دی، د تړون خلاف په ودانۍ کې ټلوېزیون او دوکانونه جوړ کړي دي.
د طالبانو د عدلیې وزیر د شمشاد بنسټګر فضل کریم فضل وزارت ته غوښتی و او ور ته ویلي یې دي چې د عمر موسسې ځمکه ور وسپاري.
د شمشاد ټلوېزیون یو تن مسوول ته په خبرو کې دا مسله رد کړه او ویې ویل، چې داسې څه نه شته.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
