د ملګرو ملتونو سرمنشي له واکمنو طالبانو غوښتنه کړې څو د ښځو پر کار لګول شوی بندیز سمدستي لغوه کړي او د ملګرو ملتونو دفترونو ته د ښځینه کارکوونکو خوندي او له خنډ پرته د تګ راتګ زمینه برابره کړي.
انټونیو ګوټېرېش دغه راز له طالبانو غوښتي چې پر ښځو او نجونو لګېدلي ټول محدودیتونه لغوه او د هغوی د بشپړ، برابر او تلپاتې ګډون له حق څخه د افغانستان د ټولنې په ټولو برخو کې ملاتړ وکړي.
ګوټېرېش ویلي، د طالبانو له لوري د افغان ښځو او نجونو پر وړاندې د تبعیض پر پالیسۍ ژوره اندېښنه لري؛ هغه پالیسۍ چې د دوی د ژوند پر ټولو برخو اغېز کوي.
د هغه په وینا، په عامه ژوند، زدهکړو او د کار په بېلابېلو برخو کې د ښځو د بشپړ ګډون محدودول د هغوی بنسټیز حقونه نقضوي او د افغانستان د اقتصادي پراختیا، ثبات او له نړیوالې ټولنې سره د بیا یوځای کېدو پر وړاندې اساسي خنډ دی.
د ملګرو ملتونو د سرمنشي دفتر وايي، د سپټمبر په ۷مه د طالبانو له لوري د ملګرو ملتونو په دفترونو کې د افغان ښځینه کارکوونکو پر کار د بندیز یو کال پوره کېږي.
طالبانو تېر کال د سپټمبر په ۷مه په ټول افغانستان کې د ملګرو ملتونو دفترونو ته د ټولو افغان ښځینه کارکوونکو پر ننوتلو بندیز ولګاوه.
انټونیو ګوټېرېش ویلي، دغه محدودیت د نړیوال قانون، په ځانګړي ډول د ملګرو ملتونو له منشور سره په ټکر کې دی او د ملګرو ملتونو د وړتیاوو د کمزوري کېدو لامل کېږي، څو خپل ماموریت ترسره او په داسې وخت کې چې د خلکو اړتیاوې لا هم لوړې دي، افغانستان ته د ژوند ژغورنې او نورو مرستو رسولو ته دوام ورکړي.
نوموړي ټینګار کړی چې د ملګرو ملتونو ټولو کارکوونکو ته د خپلو دندو د ترسره کولو لپاره د کار ځایونو ته له خنډ پرته لاسرسی ډېر مهم دی، څو دغه سازمان وکولای شي له زیانمنو خلکو، په ځانګړي ډول ښځو او نجونو، سره د هغوی د کلتوري دودونو له رعایت سره مرسته او ملاتړ وکړي.
هغه زیاته کړې چې ښځو ته د دې زمینه برابرول چې له نورو ښځو او نجونو سره بشري مرستې او اړین خدمات وړاندې کړي، د اغېزمن او اصولي بشري غبرګون لپاره ډېر مهم دي.
یاد بنسټ تر دې وړاندې هم څو ځله له طالبانو غوښتي چې په خپلو دفترونو کې د افغان ښځینه کارکوونکو پر کار لګېدلی بندیز لغوه کړي، خو تر اوسه طالبانو دغو غوښتنو ته مثبت ځواب نه دی ورکړی.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
