د افغانستان د تېر جمهوري نظام پرمهال د ننګرهار والي، ضیاالحق امرخېل وايي، د طالبانو ډېری مسوولان له نړۍ سره د ښو اړیکو او تعامل خبره کوي، خو دوی له دې تعامل مخکې باید د افغان ولس مشروع غوښتنو ته درناوی وکړي.
هغه پر خپل فېسبوک پاڼه لیکلي: “که له نړۍ سره د ښو اړیکو او تعامل خبره کوو، نو باید لومړی د خپل ولس غږ واورو، د هغوی مشروع غوښتنو ته درناوی وکړو او د هېواد دننه مشروعیت پیاوړی کړو.”
د امرخېل په وینا، له نړیوالو سره د تعامل لپاره کورنی مشروعیت مهم دی.
نوموړي زیاته کړه: “اکثریت مسوولین چې کله د خبرو لپاره سټېج ته پورته شي، همدا خبره کوي چې موږ له نړۍ سره ښې اړیکې او تعامل غواړو، خو دا یادونه نه کوي چې د دې تعامل لپاره د هېواد دننه مشروعیت او د ولس مشروع غوښتنې څومره مهمې دي.”
دغه پخوانی چارواکی دغه راز وايي٬ د نجونو زده کړې او ملي اجماع هم باید په پام کې ونیول شي.
امرخېل وویل: “د نجونو د تعلیم او تحصیل حق، د ولس اراده، ملي اجماع او نورې مشروع غوښتنې باید له پامه ونه غورځول شي.”
یاده دې وي چې د طالبانو د واکمنۍ د پنځم کال په پوره کېدو سره یوازې روسیې په رسمیت پېژندلي، او نور هېوادونه بیا د دې کار لپاره د نجونو زده کړو ته اجازه، ټولشموله حکومت جوړول او نورې غوښتنې مهمې بولي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
