قزاقستان وايي، د ترهګرو سازمانونو له نوملړه د طالبانو د نوم ایستل د طالبانو رژیم د رسمیت پېژندنې معنا نهلري.
د افغانستان په چارو کې د قزاقستان د ولسمشر ځانګړي استازي، یرکین توکوموف له رسمیت پېژندنې پرته تعامل پر تګلارې ټینګار وکړ او ویې ویل چې د افغانستان اوسنی وضعیت لا هم پېچلی دی.
د کازانفورم خبري اژانس د راپور له مخې، هغه د قزاقستان د هغې دریځ په اړه چې طالبان په رسمیت نه پېژني، وویل چې آستانه په دې برخه کې په بشپړه توګه د ملګرو ملتونو د امنیت شورا له پرېکړو سره سم عمل کوي.
هغه د افغانستان پېچلو اقتصادي او ټولنیزو شرایطو ته په اشارې وویل چې د تېرو لسیزو تجربې ښودلې چې په دې هېواد کې هر ډول اقتصادي، بشري یا بنسټیزه تشه په ناوړه او ویجاړوونکو بهیرونو ډکېږي.
نوموړي ټینګار وکړ چې له افغانستان سره مرسته د ټولې سیمې د امنیت د ټینګښت لپاره یو عملي او اغېزناک وسیله ده او په وینا یې په قانوني اقتصادي بهیرونو کې د افغانستان شاملول یوازېنۍ اغېزمنه لاره ده چې د نشهيي توکو قاچاق، ناقانونه کډوالي او پولې هاخوا ترهګري ودرول شي.
قزاقستان په ۲۰۲۴ میلادي کال کې طالبان د ترهګرو سازمانونو له لېست څخه وایستل.
یاده دې وي چې روسیه یوازېنی هېواد دی چې د وسلهوالو طالبانو رژیم یې په رسمیت پېژندلی او تر دې دمه بل کوم هېواد ورته ګام نهدی اخیستی.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
