د افغانستان لومړنی ستورمزلی، عبدالاحد مومند په جرمني کې د ۷۷ کلونو په عمر د سرطان ناروغۍ له امله ومړ.
مومند همدارنګه د هغو لومړنیو مسلمانو ستورمزلو له ډلې څخه و چې قرآن کریم یې فضا ته یووړ.
د مومند د کورنۍ او نږدې خپلوانو په وینا، مومند د غبرګولي په ۳۱مه د جرمني په یوه روغتون کې ساه ورکړه.
هغه په وروستیو کلونو کې له خپلې کورنۍ سره د اشتوتګارت په ښار کې اوسېده او د اوږدې مودې راهیسې په یې په کډوالۍ کې ژوند کاوه.
مومند په ۱۹۸۸ کال کې د افغانستان د لومړني ستورمزلي په توګه فضا ته ولاړ او خپل نوم یې د افغانستان په تاریخ کې ثبت کړ.
نوموړي د پخواني شوروي اتحاد د فضايي پروګرام له لارې د میر فضايي تمځای ته سفر وکړ او نږدې نهه ورځې یې په فضا کې تېرې کړې.
مومند د سلګونو داوطلبانو له منځه د دې تاریخي ماموریت لپاره غوره شوی و او تر سختو روزنیزو پړاوونو وروسته یې خپل فضايي سفر ترسره کړ.
نوموړي د خپل ماموریت پر مهال د افغانستان د بېلابېلو سیمو انځورونه واخیستل چې د ځمکپوهنې، د اوبو سرچینو، کانونو او زلزلهپېژندنې په برخو کې ترې ګټه واخیستل شوه.
یاد افغان ستورمزلي له میر فضايي تمځای څخه د افغانستان د جګړې د پای ته رسېدو غوښتنه هم کړې وه او له نړیوالې ټولنې یې د سولې د ټینګښت لپاره د افغانانو د ملاتړ غوښتنه کړې وه.
عبدالاحد مومند له فضايي سفر وروسته افغانستان ته د ستنېدو پر مهال په پراخه کچه وستایل شو او د یوه ملي اتل په توګه وپېژندل شو، خو د ۱۹۹۲ کال له سیاسي بدلونونو او کورنیو جګړو وروسته یې هېواد پرېښود او په جرمني کې مېشت شو.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
