د افغانستان د تېر جمهوري نظام وروستی لوړپوړی قوماندان، جنرال سمیع سادات د طالبانو له لوري د پاکستان په ځينو سيمو کې د بېپيلوټه الوتکو بريدونه د کړکېچونو بېپروا زياتوالی بللی او غندلي يې دي.
سادات په ایکسپاڼه لیکلي، دغه بريدونه د پاکستان د پراخ پوځي غبرګون خطر زياتوي.
نوموړي وویل، طالبان نه دا توان لري او نه هم دا اراده چې افغان ملکيان د دغو اقداماتو له پايلو څخه خوندي وساتي.
د وسلهولو طالبانو د دفاع وزارت د جمعې په ورځ اعلان وکړ چې د هوايي بريدونو په ترڅ کې یې د پاکستان د بلوچستان او خيبر پښتونخوا په دوو ايالتونو کې د داعش ډلې اړوند مرکزونه په نښه کړي دي.
د طالبانو په خبرپاڼه کې راغلي: “له دې وروسته به افغانستان هېڅ ډول ګواښ او خطر ته چې د هغه د امنيت او ثبات پر ضد وي، فرصت ور نه کړي او د خپلو ټولو امکاناتو په کارولو سره به يې په لومړيو پړاوونو کې له منځه يوسي.”
خو سادات ويلي چې دا ډول څرګندونې د دې خطر لري چې پاکستان د افغانستان پر خاورې د بريد کولو لپاره وهڅوي.
د سادات په وينا، په تېرو کلونو کې د طالبانو لخوا د ترهګرو ډلو لکه د پاکستاني طالبانو تحريک ټيتيپي او القاعده ملاتړ، افغانستان د جګړې په ډګر بدل کړی او د ميليونونو بېګناه افغانانو ژوند يې له خطر سره مخ کړی دی.
نوموړي له پاکستانه غوښتي چې زغم وښيي او د ملکي تلفاتو د مخنيوي لپاره ټول ممکن اقدامات ترسره کړي.
جنرال سادات ليکلي چې د افغانستان خلک بايد د طالبانو د خطرناکو او غيرمسؤلانه کړنو بيه ورنه کړي.
ورته مهال د افغانستان د ملي مقاومت جبهې هم پر پاکستان د طالبانو هوايي بریدونه وغندل.
د دې جبهې د بهرنیو اړیکو مسوول، علي میثم نظري، وایي، هغه افغانستان چې د طالبانو تر ولکې لاندې دی، نه د افغانستان د خلکو په ګټه دی او نه هم د سیمې د امنیت او ثبات په ګټه.
نظري په اېکس کې ټینګار کړی چې د افغانستان د شتون فلسفه باید د یوه بېطرفه، باثباته او رغنده دولت پر بنسټ ولاړه وي؛ داسې یو مرکز چې د سوداګرۍ، امنیت او هوساینې لپاره مناسب وي او په هغه کې سیمه او نړیواله ټولنه دواړه د یوه آزاد او سولهییز افغانستان تر سیوري لاندې د امنیت او ارامۍ احساس وکړي.
هغه د افغانستان له دیموکراتیکو مخالفینو او د سیمې له اړوندو لورو وغوښتل چې جدي خبرو اترو ته داخل شي او ګډ تفاهم ته ورسېږي.
د ملي مقاومت جبهې دې چارواکي ټینګار وکړ چې د اوسني مسیر دوام به د افغانستان د راتلونکي لپاره د یوه هېواد په توګه وجودي ګواښ وي.
خو پاکستان د طالبانو هغه ادعا رد کړې چې ګواکې پر دغه هېواد د ډرون بريدونه شوي دي.
د پاکستان د اطلاعاتو او خپرونو وزارت د حقيقتموندنې څانګې ويلي دي چې: د “ترهګرو روزنيز مرکزونه، د داعش مرکزونه او له دوو لسيزو څخه زياتې نورې ترهګرې ډلې، په حقيقت کې د افغانستان د طالبانو تر واک لاندې سيمو کې شتون لري او له هماغه ځايه اداره او ملاتړ کېږي.”
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
