طالب پلوې رسنۍ، المرصاد خبر ورکړی چې نامعلومو وسلهوالو د خیبر پښتونخوا په قمبرخېلو کې د داعش خراسان څانګې پر څو پوستونو مرګوني بریدونه کړې دي.
دغه رسنۍ وایي، دا بریدونه نن ترسره شوي، خو د تلفاتو او زیانونو دقیق شمېر لا نه دی معلوم.
دغه بریدونه له هغو هوایي بریدونو وروسته شوې چې د طالبانو حکومت هوايي ځواکونو د بلوچستان او خیبر پښتونخوا په ځینو سیمو کې د داعش پر پټنځایونو ترسره کړي وو.
المرصاد د پېښې په اړه نور جزییات نه دي خپاره کړي او تر اوسه هېڅ ډلې یا فرد د دغه برید مسولیت نه دی منلی. پاکستاني چارواکو هم تر دې دمه د برید پخلی نه دی کړی.
خو پاکستانیو چارواکو د تېرې ورځې د بریدو په اړه د طالبانو ادعا ناسمه او هغه یې تبلیغاتي بللې وه.
ورته مهال د امریکايي استخباراتو یا سيآیاې پخوانۍ مامورې، سارا اډمز ویلي، د داعش پرضد د طالبانو عملیات واقعیت نهلري.
هغې ادعا کړې چې د داعش پر ضد د ترسره شوو عملیاتو په اړه راپورونه د کره شواهدو پرځای د نا تایید شویو ادعاوو پر خپرېدو ولاړ دي او په وینا یې چې دا ډول روایتونه باید له خپلواکې څېړنې پرته د واقعیت په توګه ونه منل شي.
سارا اډمز په یوه وروستۍ لیکنه کې ویلي چې د طالبانو له لوري د داعش-خراسان پر ضد د عملیاتو په اړه خپرې شوې ادعاوې د ځمکنیو شواهدو له مخې نه تاییدېږي.
نوموړې ادعا کړې چې د ۲۰۲۶ کال د جون په ۱۸مه طالبانو ویلي وو چې په پاکستان کې یې د داعش-خراسان اهداف په نښه کړي، خو په وینا یې ځینې نړیوالو رسنیو دا ادعاوې له کره څېړنې پرته خپرې کړې.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
