ملګري ملتونه وايي، په افغانستان کې هر کال د هرو ۱۰۰ زرو زېږونونو پر مهال شاوخوا ۶۰۰ میندې خپل ژوند له لاسه ورکوي.
د ملګرو ملتونو اړوند د بشري چارو د همغږۍ دفتر یا اوچا د افغانستان استازې، اولګا چیریفکو ویلي، افغانستان د نړۍ له هغو هېوادونو څخه دی چې د میندو د مړینې تر ټولو لوړه کچه لري.
چیریفکو ویلي، ښځې او نجونې په افغانستان کې د روان بشري بحران تر ټولو ډېر اغېزمنې شوې دي او له ګڼو روغتیايي او بشري ستونزو سره مخ دي.
اولګا چیریفکو ټینګار کړی چې ښځې د ژوند ژغورونکو خدمتونو، په ځانګړي ډول د روغتیايي خدماتو په وړاندې کولو کې مهم رول لري، خو د ښځو پر کار او ټولنیز حضور محدودیتونه ښايي بشري مرستې او روغتیايي خدمات لا کمزوري کړي.
نوموړې وايي، په بدخشان ولایت کې هغه روغتون چې د سیمې یوازېنۍ د نویو زېږېدلو ماشومانو د ځانګړې پاملرنې څانګه لري، بشري او روغتیايي کارکوونکي په ځانګړي ډول ښځینه کارکوونکې هڅه کوي د امکان تر حده د میندو او نویو زېږېدلو ماشومانو ژوند وژغوري.
اولګا چیریفکو زیاته کړې چې د دغو روغتیايي خدمتونو دوام حیاتي ارزښت لري او باید د پایدار ملاتړ له لارې خوندي وساتل شي، څو د میندو او ماشومانو د ژوند ژغورنې چارې دوام ومومي.
د اوچا استازې په وینا، په افغانستان کې هیله د هغو روغتیايي کارکوونکو په هڅو کې نغښتې ده چې هره ورځ د میندو او ماشومانو د ژغورلو لپاره نه ستړې کېدونکې مبارزه کوي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
