د افغانستان د تېر جمهوري نظام پر مهال په ولسي جرګه کې د ننګرهار د خلکو استازې او د پوهاند محمد اسمعیل یون مېرمن، ارین یون د هرات وروستي لاریونونه تمثیلي ټوټې وبللې.
هغې په خپل فېسبوکپاڼه لیکلي: ټولې افغانې مېرمنې د اسلامي امارت څخه د خپلو حقه حقونو غوښتتونکي دي او دا لړۍ به روانه وي، مګر کومه تمثیلي ټوټه چې په هرات کې د لنډغرو او شیطان انټرنشنل په ملاتړ تر سره شوه دا صرف د امنیت شورا د غونډې په خاطر وه چې د دا ډول تمثیلي ټوټو لوبغاړي او طرح کوونکي د افغانو ښځو استازیتوب نهشي کولی بلکې موږ ته د ناهید شهیدې خور یاد تازه کوي”.
په هرات کې له څو ورځو راهیسې د طالبانو لخوا د جامو د طرز یا حجاب په پلمه د ښځو پر نیول کېدو او د هغوی د خوشې کېدو لپاره لاریونونه دوام لري چې ویل کېږي، مرګژوبله هم لري.
په هرات کې د طالبانو له لوري د لاریون کوونکو ځپل په کور دننه او بهر ګڼ غبرګونونه پارولي.
د افغانستان پخوانیو یوشمېر سیاستوالو، نړیوالو سیاسي څېرو، هېوادونو، مدني ټولنو او بشري حقونو فعالانو په هرات کې د طالبانو لخوا د ښځو نیول او د لاریونونو ځپل غندلي او له بشري حقونو بنسټونو او ملګرو ملتونو یې غوښتي، چې د ښځو له حقونو د سرغړونې او د لاریونونو ځپلو وضعیت ته جدي پاملرنه وکړي او پر وړاندې یې اغېزمن ګامونه پورته کړي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
