د خیبرپښتونخوا په بنو کې د شوي برید په غبرګون کې د پاکستان د دفاع وزير خواجه محمد آصف خبرداری ورکړی چې پاکستان د دې برید په ځواب کې پرېکنده عمليات کولی شي.
آصف وايي، پاکستان به یې له طالبانو سره د هند په څېر چلند وکړي.
خواجه اصف وویل، هند په سرپرستۍ کې دا نیابتي جګړه د طالبانو له لارې روانه ده.”
هغه وويل: “دومره ناشکری په بشري تاریخ کې کله چا نه ده کړې لکه څنګه چې طالبانو کړې ده.”
خو دغه چارواکي د دې ناشکرۍ په اړه ډېر جزییات نه دي ورکړي.
هغه زياته کړه: “موږ به د دې ترهګرۍ په پايله کې د توی شوې وينې د هر څاڅکي حساب واخلو، تر ترهګرو د بشپړ له منځه تللو به نه کېنو.”
اخوا د پاکستان د بهرنیو چارو وزارت د دوشنبې په ورځ د طالبانو د حکومت شارژدافېر ته د بنو د برید په تړاو خپل اعتراضلیک سپارلی او پاکستان ادعا کړې چې دغه برید په افغانستان کې پلان شوی و.
د پاکستان د بهرنیو چارو وزارت ویلي چې د پلټنو، شواهدو او تخنیکي استخباراتي معلوماتو له مخې دا برید د هغو وسلهوالو له خوا پلان شوی چې په افغانستان کې مېشت دي.
طالبانو تراوسه د آصف د څرګندونو په اړه رسماً څه نه دي ویلي، خو د دوی ویاند ذبیحالله مجاهد تېره ورځ ویلي، افغان خاوره د هېڅ هېواد پرضد نه کارول کېږي.
نوموړي له پاکستان غوښتي څو په خپله خاوره کې دې د وسلهوالو عملیاتو او تحرکاتو مخنیوی وکړي.
مجاهد په خپور کړي غږیږ پیغام کې د پاکستان پوځ مشر د وړمې ورځې څرګندونې رد کړې چې د افغانستان خاوره د پاکستان پر ضد کارول کېږي.
هغه وویل: “اسلامي امارت اجازه نه ورکوي چې د افغانستان خاوره د پاکستان په ګډون د هېڅ هېواد پر ضد وکارول شي او دا د امارت د ستراتېژۍ یوه برخه ده.”
د پاکستان د پوځ مشر ویلي، ترهګري د افغانستان له خاورې څخه راپورته کېږي او طالبان باید د ترهګرۍ مرکزونه له منځه یوسي.
پاکستان تور لګوي چې د کله نه طالبان په افغانستان واکمن شوي، پاکستان کې ترهګري سېوا شوې ده، خو طالبانو بيا د پاکستان دغه تور تل رد کړی او پاکستان کې روانه ناامني يې د دغه هېواد کورنۍ ستونزه بللې ده.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
