د افغانستان پخواني ولسمشر، حامد کرزي پر خپل فېسبوکپاڼه د یوه بیان په خپرولو سره د نجونو پر مخ د ښوونځیو او پوهنتونونو په بیا پرانیستلو ټینګار وکړ.
کرزي دغه څرګندونې د قطر د غوره روزنې بنسټ له لوري افغان نجونو ته د تحصیلي بورسونو د زمینې برابرولو په پار کړې دي.
هغه له قطر مننه کړې چې افغانو نجونو ته یې د تحصیلي بورسونو زمینه برابره کړې او په وینا یې د همدې برنامې په ترڅ کې ۷۴ افغانې نجونې وتوانېدې چې په امریکا کې له بېلابېلو پوهنتونونو څخه فارغې شي.
کرزي د دې محصلینو پر فراغت خوښي څرګنده کړې او د افغانو نجونو د تعلیم د دوام لپاره د ټولو بنسټونو هڅې او ملاتړ وستایه.
هغه ټینګار وکړ چې د هېواد د پرمختګ لپاره ضروري ده چې روزل شویو کادرونو ته د کار فرصتونه برابر شي او د نجونو ښوونځي او پوهنتونونه بېرته پرانیستل شي څو افغانې لوڼې د هېواد دننه زدهکړو ته لاسرسی پیدا کړي.
حامد کرزی داسې مهال په افغانستان کې د نجونو پر مخ د ښوونځیو او پوهنتونونو د بیا پرانیستلو غوښتنه کوي چې د وسلهوالو طالبانو حکومت په کور دننه او بهر دغه شرعي او اصولي غوښتنې ته تراوسه مثبت ځواب نه دی ویلي.
د دوی د لوړو زدهکړو وزیر، ملا ندامحمد ندیم څه موده وړاندې خبرداری ورکړی و چې د نجونو د زدهکړو په اړه پوښتنه کول هم تر بیاځلي منع ده.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
