د زدهکړو پښتنه فعاله او د نوبل د سولې جایزې ګټونکې، ملاله یوسفزۍ د افغان ښځو او نجونو د وضعیت په اړه د نړۍ د مشرانو پر بېعملۍ نیوکه کړې او د هغو کسانو د حسابورکولو لپاره یې د اغېزناکو مېکانېزمونو د رامنځته کېدو غوښتنه کړې چې د افغان ښځو حقونه تر پښو لاندې کوي.
هغه وايي، په افغانستان کې د طالبانو له بیا واکمنېدو سره د افغان ښځو او نجونو راتلونکې لهمنځه تللې ده.
یوسفزۍ د طالبانو د جزايي اصولنامې یادونه وکړه او ویې ویل چې د دې اصولنامې لهمخې د مېړه لخوا د ښځې وهل او ټکول تر هغه وخته د عدلي تعقیب وړ نهګڼل کېږي چې هډوکی یې نه وي مات شوی.
هغې ټینګار وکړ چې ځینې نړیوال مشران دا ډول چلند یوه کلتوري او کورنۍ مسئله ګڼي، خو د هغې په وینا دا برداشت د منلو وړ نهدی او زیاتوي چې په نړیوالو قوانینو کې د ښځو او نجونو لپاره کافي خوندیتوب نهشته.
یوسفزۍ د افغان نجونو او ښځو د زدهکړو دوام ته په اشارې وویل، سره له دې چې له سختو محدودیتونو او ځپنې سره مخ دي، بیا یې هم خپلې زدهکړې نهدي پرېښې.
ملالې یوسفزۍ د ۲۰۲۱ کال پر مهال په افغانستان کې د طالبانو د بیا واکمنېدو په اړه وویل: “ما باور نهشو کولی، هغه کسان چې یو وخت یې زما پر لور ټوپک نیولی وو، بېرته واک ته رسېدلي او اوس د ټولو افغان ښځو او نجونو راتلونکې ترې اخلي.”
په افغانستان کې د وسلهوالو طالبانو له بیا واکمنېدو وروسته پر ښځو او نجونو د زدهکړو، کار او ټولنیز حضور په برخو کې پراخ محدودیتونه لګېدلي دي.
یوسفزۍ او د ښځو د حقونو نورو فعالانو په تېرو کلونو کې څو ځله د افغان ښځو او نجونو د حقونو د ملاتړ پر اړتیا ټینګار کړی دی.
خو وسلهوال طالبان سره له دې چې د کورنیو او نړیوالو له نیوکو او همداراز پراخو غبرګونونو سره مخ شوي، تر اوسه د ښځو پر ضد له هېڅ یوه فرمان څخه نهدي پر شا شوي او دا محدودیتونه خپلې کورنۍ چارې بولي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
