امنیسټي انټرنېشنل یا د بخښنې نړیوال ویلي، د طالبانو تر واک لاندې افغانستان په سویلي اسیا کې یوازېنی هېواد و چې تېر ۲۰۲۵م کال یې۶ کسان او همدارنګه ایران په ورته موده کې ۲۱۵۹ کسان اعدام کړي دي.
د بخښنې نړیوال سازمان په وینا، طالبانو ټول اعدامونه د کال په اوږدو کې په عام محضر کې ترسره کړي او یو کس ته د کفر په تور د مرګ سزا هم صادره شوې ده.
د وسلهوالو طالبانو لخوا د خپرو شویو راپورونو له مخې، یادې ډلې په افغانستان کې د خپلې بیا واکمنۍ په نږدې پنځو کلونو کې لږترلږه ۱۲کسان په فراه، لغمان، غزني، جوزجان، بادغیس، نیمروز او خوست ولایتونو کې د سلګونه کسانو په حضور کې اعدام کړي دي.
د ۱۹۹۰مې لسیزې په وروستیو کې د طالبانو د پخوانۍ واکمنۍ پرمهال هم علني اعدامونه او سنګسار د هغوی د حکومت له مهمو نښو څخه شمېرل کېدل.
د وسلهوالو طالبانو چارواکي اعدام ته د قصاص نوم ورکوي او وایي، د قصاص عملي کول د اسلامي شریعت پر بنسټ ترسره کېږي او دوی د دې سزاګانو عملي کول په افغانستان کې د درنو جرمونو او وژنو د مخنیوي لپاره اړین بولي.
ورته مهال د بخښنې نړیوال سازمان ویلي، د اعدام د سزا د لغوه کولو نړیوال بهیر دوام لري او کله چې د بخښنې نړیوال سازمان په ۱۹۷۷م کال کې د اعدام پر وړاندي خپل فعالیت پیل کړ، یوازې ۱۶ هېوادونو دغه سزا لغوه کړې؛ خو اوس دغه شمېر ۱۱۳ هېوادونو ته رسېدلی دی.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
