روسیه په پلان کې لري چې په کابل کې د ولسي ډیپلوماسۍ مرکز جوړ کړي.
د روسیې د پارلمان یا دوما د بهرنیو چارو کمېټې غړی او د دغه هېواد د عامه ډیپلوماسۍ مرکز عمومي رئیس دیمیتري سیولوف ویلي، دغه اداره به د ۲۰۲۶م کال تر پایه په کابل کې خپله استازولي پرانېزي.
د سیولوف وینا؛ د یاد اقدام موخه د روسي ژبې وده او د روسیې تاریخ او کلتور معرفي کول دي.
سیولوف وویل: “په کابل کې د استازولۍ دفتر د پرانیستلو لپاره خبرې روانې دي او موږ هیلهمن یو چې د روان کال تر پایه په افغانستان کې خپل پروګرامونه پلي کړو.”
د نوموړي په خبره، د دغه مرکزونو اصلي موخه د روسي ژبې پراختیا، د روسیې د تاریخ او کلتور معرفي کول او په ځانګړي ډول په ښوونځیو او پوهنتونونو کې د ښوونیزو پروژو پلي کول دي.
د روسیې د عامه ډیپلوماسۍ مرکز اوسمهال په نهو افریقایي هېوادونو او ابخازیا کې فعال دی او استازي یې تر ډېره کلتوري او ښوونیزې پروژې پلي کوي.
د روسیې د ولسي ډیپلوماسۍ مرکز په روسیه کې ثبت شوی هغه سازمان دی، چې په ۲۰۲۴م کال کې فعال شوی او موخه یې ولسي ډیپلوماسي ده.
د یاد سازمان اصلي فعالیتونه په نورو هېوادونو کې د روسي ژبې، کلتور او تاریخ وده، د کورونو جوړول، په ښوونځیو او پوهنتونونو کې د ښوونیز، کلتوري او علمي پروژو پلي کول او د هېوادونو د خلکو ترمنځ د نارسمي اړیکو پیاوړتیا شامله ده.
دغه مرکز د روسیې له دولتي بشري همکاریو سازمان سره نږدې همکاري لري؛ خو ځان د یوې نادولتي ادارې په توګه معرفي کوي. اوسمهال یې تمرکز تر ډېره پر افریقايي هېوادونو دی، خو اوس افغانستان ته هم خپل فعالیتونه پراخوي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
