د طالبانو تر کنټرول لاندې د اطلاعاتو او کلتور وزارت په یوه اعلامیه کې تایید کړه چې په کابل کې د طلوعنیوز خصوصي رسنۍ دوه خبریالان، منصور نیازی او عمران دانش څو ورځې وړاندې نیول شوي دي.
د دې ډلې په اعلامیه کې راغلي چې دغو خبریالانو دوسیه تر څېړنو لاندې ده او محکمې تر اوسه پرېکړه نه ده کړې.
د یاد شوي وزارت ویاند، خبیب غفران د غويي پر۲۲مه ویلي، چې د دې ډلې امنیتي ادارو څو ورځې وړاندې د طلوعنیوز دوه خبریالان، منصور نیازی او عمران دانش نیولي دي.
وزارت ویلي چې د یادو خبریالانو قضیې تر څېړنو لاندې دي.
په اعلامیه کې راغلي، د نیول شویو خبریالانو دوسیې لا هم بشپړې شوې نه دي او محکمې تراوسه د هغوی په اړه کومه پرېکړه نه ده کړې.
نوموړي وزارت ویلي، په رسنیو کې د دوی په اړه خپاره شوي خبرونه ناسم دي.
د طلوعنیوز د خبرونو ویاند او د سیاسي او جنايي خپرونو چلوونکی منصور نیازی د غويي ۱۷مه د کابل له شېرشاه مېنې (کارته چهار) او د خبرونو ویاند او د سیاسي برخې مسوول عمران دانش د غويي ۱۹مه د طلوعنیوز دفتر له شاوخوا سیمو څخه نیول شوي دي.
د رسنیو ګڼو بنسټونو د یادو خبریالانو نیونه غندلې او له طالبانو یې غوښتي څو ژر تر ژره دې خوشې کړي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
