د طالبانو د بهرنیو چارو وزارت ویلي، افغان نجونې کولی شي د دیني مدرسو، کورنیو او انلاین زدهکړو له لارې تعلیم ته دوام ورکړي او ډاکټرانې شي.
د دې وزارت ویاند، عبدالقهار بلخي له اتریشۍ ورځپاڼې وینرتسایتونګ سره په مرکه کې د نجونو پر زدهکړو لګېدلي بندیز څخه دفاع کړې ده.
بلخي ویلي، دا محدودیت یوازې له شپږم ټولګي پورته په دودیز ښوونیز نظام پورې تړاو لري.
هغه زیاته کړه، دیني مدرسې د دیني علومو ترڅنګ ساینس او نورې نوې علمي څانګې هم تدریسوي او د نجونو لپاره انلاین زدهکړې هم اجازه لري.
وسله والو طالبانو په ۲۰۲۱م کال کې له شپږم ټولګي پورته د نجونو زدهکړې وځنډولې او په ۲۰۲۲م کال کې یې په دولتي او خصوصي پوهنتونونو کې د ښځو پر زدهکړو هم بندیز ولګاوه.
طالبانو دغه راز، په ۲۰۲۴م کال کې یې په طبي انسټیټیوټونو کې هم د نجونو او ښځو زدهکړې منع کړې.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
