د پاکستان لومړي وزیر، شهباز شریف نن په قرغزستان کې د شانګهای د همکارۍ سازمان په غونډه کې په خپله وینا کې وویل، تر هغه چې وسلهوالې ډلې د افغانستان له خاورې څخه د پاکستانیو او د نورو هېوادونو د وګړو پر ضد کار اخلي، د تلپاتې سولې ترلاسه کول به لا د دوی له لاسرسي لرې وي.
شریف وايي، اسلاماباد د یوه سولهییز، باثباته او سوکاله افغانستان غوښتونکی دی، خو وسله وال باید د دې هېواد خاوره ونه کاروي.
د هغه په وینا، ترهګري لا هم له هغو سترو ګواښونو څخه ده چې سیمه اغېزمنوي، او پاکستان په فعاله توګه هڅه کړې چې د دې پدیدې پر وړاندې د مبارزې په برخه کې سیمهییزه همکاري پیاوړې کړي.
هغه زیاته کړه چې ډېر لږ داسې هېوادونه شته چې له ترهګرۍ سره یې د پاکستان په څېر په دومره قاطعیت مبارزه کړې وي.
شهباز شریف وویل چې په تېرو دوه نیمو لسیزو کې په پاکستان کې له ۹۰زرو څخه ډېر کسان د ترهګرۍ قرباني شوي او د دغه هېواد اقتصاد ته د ۱۵۰ میلیارده ډالرو په ارزښت زیانونه اوښتي دي.
هغه زیاته کړه: “دا قربانۍ یوازې د پاکستان لپاره نه وې، بلکې د یوې لا خوندي او باثباته سیمې د رامنځته کولو او له سیمې هاخوا د امنیت د تأمین لپاره ترسره شوې دي.”
د شانګهای د همکارۍ سازمان د غړو هېوادونو مشرانو د قرغزستان په پلازمېنه بیشکک کې د دې سازمان د غونډې په وروستۍ ورځ یوه اعلامیه خپره کړه.
په اعلامیه کې ټینګار شوی چې په افغانستان کې د ټولو قومي او سیاسي ډلو د استازو په ګډون د یوه ټولشموله حکومت جوړول په دغه هېواد کې د تلپاتې سولې او ثبات د ترلاسه کولو یوازېنۍ لار ده.
خو طالبان وايي، حکومت یې ټولشموله دی او مخالفانو سره خبرې اړینې نه بولي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
