د سپاهي میهن جبهې قوماندان، قیوم ملنګ د بدخشان ولایت پر یفتل پایین ولسوالۍ له برید پنځه ورځې وروسته د لومړي ځل لپاره د یوه غږیز پیغام په خپرولو سره اعلان وکړ چې دی او ځواکونه یې بشپړ روغ او جوړ دي.
هغه وویل: ټول(د دې جبهې غړي) روغ دي او د طالبانو هغه ادعا یې رد کړه چې د دې جبهې غړي نیول شوي دي.
ملنګ د چهارشنبې په ورځ وویل: “زه په بشپړه روغتیا کې یم. د دښمن د پروپاګند پسې مه ګرځئ. موږ ټول جوړ او روغ یو. د سپاهي میهن جبهه خپل پلان او موخې لري او غړي یې آزادي تر هر څه غوره ګڼي.”
د تېرې جمعې په سهار، د تازه جوړې شوې سپاهي میهن جبهې کسانو په یوه ناڅاپي برید کې د بدخشان ولایت د مرکز فیضاباد ښار ته څېرمه یفتل پایین ولسوالۍ د څو ساعتونو لپاره ونیوله.
برید کوونکي دولتي ودانیو ته ننوتل، پوځي تجهیزات یې د غنیمت په توګه له ځان سره یوړل او پر ځینو ودانیو یې خپل بیرغ پورته کړ.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
