د امریکا د کانګرس یوه غړي، ټیمبرچټ ویلي، متحدهایالات اوس هم هره اونۍ طالبانو ته د ۴۰ میلیونه ډالرو نغدي کڅوړه لېږي.
ټیمبرچټ د امریکا پر سنا نیوکه کړې چې د ده د وړاندیز شوي قانون په اړه یې رایه نه ده ورکړې چې له مخې یې ترهګرو ته د مالیه ورکوونکو د پیسو ورکړه بندېږي.
هغه په خپله اېکس پاڼه لیکلي، د ترهګرو لپاره د مالیاتو نه ورکولو په نوم د هغه وړاندیز شوی قانون د سنا په جرګه کې ځنډېدلی دی.
نوموړي په خپل پیغام کې زیاته کړې: “ټولو ته خبر ورکړئ چې دوی کولای شي له موږ څخه په وړیا توګه کرکه وکړي.”
د یاد امریکايي چارواکي په وینا، دا پیسې په مستقیم ډول د امریکا د مالیه ورکوونکو له جیبونو څخه ایستل کېږي او د طالبانو لاسته ورځي.
ټیمبرچټ له خلکو غوښتي چې د دې وضعیت په اړه ځانونه خبر کړي او د سنا د دې بېعملۍ په وړاندې خپل غږ پورته کړي.
هغه ټینګار کوي چې د هغه د قانون تصویبول د دې لپاره اړین دي چې ترهګرو ډلو ته د امریکایي وګړو د مالیاتو د ورتګ مخه ونیول شي.
طالبانو ته د ۴۰ میلیونه ډالرو د اونیو کڅوړو لېږل هغه موضوع ده چې تر دې وړاندې هم د یوشمېر نورو امریکایي چارواکو له تندو نیوکو سره مخ شوې ده.
له دې مخکې د افغانستان د تېر جمهوري نظام د ولسمشر لومړي مرستیال، امرالله صالح او د جمهوري نظام یوشمېر نورو لوړو پوړو چارواکو هم طالبانو ته د امریکا د دغه نغدي کڅوړو په تړاو نیوکې کړې وې.
هغه ویلي وو چې د دغو کڅوړو له کبله طالبانو خپل بنسټونه پیاوړي کړي او پر افغانانو یې د ژوند کړۍ نوره هم تنګه کړې ده.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
