د افغانستان د تېر جمهوري نظام پر مهال د کورنیو چارو وزیر، ویس برمک د بریتانیا په پارلمان کې په یوه غونډه کې خبرداری ورکړی چې د طالبانو تر واک لاندې افغانستان یوه کورنۍ مسئله نه ده، بلکې د سیمې او نړۍ د امنیت لپاره په رامنځته کېدونکي ګواښ بدلېږي.
هغه وویل طالبان د شاوخوا ۲۳زره دیني مدرسو په پراخولو سره د افغانستان ښوونیز نظام پر یوه ایډیولوژیکي جوړښت بدلوي، داسې جوړښت چې د هغه په وینا عصري زدهکړې له منځه وړي، نجونې له زدهکړو محروموي او نوی نسل په یوه تړلي او د افراطیت لپاره چمتو چاپېریال کې روزي.
برمک ټینګار وکړ چې له طالبانو سره د نړیوالې ټولنې پنځه کلنه تعامل ناکام شوی او سیمه به هم د دې بهیر له پایلو خوندي پاتې نهشي.
ویس برمک داسې مهال د افغانستان د روان وضعیت په اړه اندېښنه څرګندوي چې د راپورونو پر بنسټ دا مهال زرګونه بهرني جنګیالي په افغانستان کې روزنیز کمپونه لري.
له دغو ترهګرو ډلو یوه ټيټيپي ده چې پاکستان تل غوښتنه کړې چې د افغانستان خاوره باید د دوی پر ضد ونه کارول شي.
اخوا د پاکستان لومړي وزیر، شهباز شریف د سنډيټایمز په نوم له یوې برتانوۍ ورځپاڼې سره په مرکه کې په افغانستان کې د ترهګرو پر پټنځایونو عملیات د پاکستان مجبوري وبلله.
هغه وویل: “موږ کابل ته څو ځله د سولې پیغامونه استولي، ځکه موږ باید تل د ګاونډیانو په توګه ژوند وکړو. زموږ له افغانستان سره تر دوه زره کیلومترو زیاته ګډه پوله ده، که سوله وي، دواړه هېوادونه به سوکاله وي.”
د شریف په خبره، د پاکستان یوازېنۍ غوښتنه دا وه چې طالبان ډاډ ورکړي څو ترهګرو ډلو ته به اجازه نه ورکول کېږي چې خپله خاوره وکاروي.
هغه زیاته کړه: “موږ څنګه کولای شو له هغو کسانو سره عادي چلند وکړو، په داسې حال کې چې زموږ بې ګناه خلک وژل کېږي؟ د ترهګرۍ داغ د پاکستان له مخه لرې کول زموږ نه ماتېدونکی عزم دی. دا جګړه موږ یوازې د پاکستان لپاره نه، بلکې د ټولې نړۍ لپاره کوو.”
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
