په خوست کې د طالبانو د حکومت والي، عبدالرحمن حقاني په یوه غونډه کې له خلکو غوښتنه کړې څو د خپلو سرونو په بیه د دوی له نظام څخه دفاع وکړي.
هغه وویل، د دغه اسلامي نظام، جغرافیې او فضا ساتنه پر خلکو فرض ده.
حقاني وویل: “د ټول ملت څخه مې غوښتنه ده چې د خپل اسلامي نظام دفاع وکړي، د خپل دین او جغرافیې دفاع وکړي.”
دغه څرګندونې داسې مهال دي چې خپله د طالبانو نورو چارواکو څو څو ځله اندېښنه ښودلې چې د افغانستان فضا د دوی په لاس کې نه ده او اشغال شوې ده.
څو میاشتې مخکې د دوی دفاع وزیر، ملا یعقوب هم اعتراف کړی و چې د افغانستان فضا د دوی په کنټرول کې نه ده او فضا اشغال شوې ده.
له دغو څرګندونو سره سره هاخوا پاکستان خبرداری ورکړی، که طالبان د افغانستان خاوره کې د ټيټيپي وسلهوالو د پټنځایونو د مخنیوي لپاره لاس په کار نهشي، نو یوځل بیا پر افغانستان بریدونه وکړي.
د پاکستان دفاع وزیر، خواجه محمد آصف په خپلو تازه څرګندونو کې ویلي، که طالبان یې خبرو ته غوږ کېنږدي، نو کابل سره به هم د نوي ډيلي په څېر چلند وکړي.
اخوا یوشېر سرچینو ویلي، نن پنجشنبه په کابل کې یې د چاودنو او ډزو غږونه اورېدلي دي.
د کابل اوسېدونکو ویلي، له چاودونو او د ډزو د غږونو تر اورېدو وروسته د کابل پر فضا الوتکو هم ګزمې کړې دي.
تراوسه طالبانو په دې اړه څه نه دي ویلي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
