د طالبانو په روانه دوره کې د اوبو او انرژۍ وزارت مخکېنی سلاکار، فاروق اعظم چې څه موده یې د دې ډلې زندان یې هم تېر کړی، وايي، واقعیت دا دی چې ایران نه یوازی امارت په رسمیت نه پېژني، بلکې دښمنان یې د خامنه يي جنازې ته د امارت سره په مساوی حیثیت وربولي او په ملګرو ملتونو کې د امارت د منتقدینو په ډله کی ولاړ دی.
هغه وویل، سره له دې چې د ایران په وړاندې د امارت اوسنی موقف محتاط، مثبت او سخاوتمندانه دی، خو د اعظم په وینا، په ټوله کې دغه حالت د جدي تأمل وړ دی او “زموږ پر نړیوالو اړیکو د واقعیتونو پر بنا یو تجدید نظر په کار دی.”
هغه وايي، په ۲۰۰۱م کی امریکا پر افغانستان برید وکړ چې ایران د امریکا ټینګ ملګری و او د امریکا د پوځ مشر، ټامي فرانک او د ایران د پوځ مشر، یحیی مصطفوی په ګډه په افغانستان کی د امارت پر ضد د جنګ نقشه تیاروله او د افغانستان په جنوب غرب کې عملا د طالبانو پرضد یې جنګ مخته بیوه.
د هغه په خبره: “آیت الله علي خامنه يي چې اوس یې جنازې ته مشران ورغلی دي، په ښکاره ویل چې که د ایران مرسته نه وای، امریکا افغانستان آسانه نه شو نیولای. همداراز، ایران شل کاله په افغانستان کې د امریکا سره بې دریغه همکاري وکړه او د کابل د حکومت د استحکام لپاره یې ډېر کار وکړ. له بلې خوا د ایراني مقاماتو په قول، تېر شل کاله چی هره مرسته ایران د طالبانو سره پټه کوله، د امریکا سره په تفاهم وه.”
خو فاروق اعظم زیاتوي : “د افغانستان په وړاندې د ایران د پالیسی برعکس، کله چې امریکا پر ایران په تېره فبرورۍ کې حمله وکړه، افغانستان د ایران پر خوا ودرېد، او د امریکا یرغل یې وغنده او عملا یې تر خپله وسه مرسته هم ورسره وکړه.”
د اعظم په وینا، د امارت دغه موقف ایران بار بار ستایلی او ویلی یې دي چې اوس د امارت په رسمیت پېژندلو ته نږدې شوي دي.
خو د ده په باور، واقعیت دا دی چې ایران نه یوازې امارت په رسمیت نه پېژني، بلکې د امارت دښمنان د خامنه يي جنازې ته د امارت سره په مساوی حیثیت وربولي او په ملګرو ملتونو کې د امارت د منتقدینو په ډله کې ولاړ دی.
ایران تېره ورځ د طالبانو د رییس الوزرا د مرستیال، عبدالغني برادر په مشرۍ او د احمد مسعود په مشرۍ د مقاومت جبهې پلاويو ته بلنه ورکړې وه څو د ایران د وژل شوي رهبر د جنازې په مراسمو کې ګډون وکړي چې دواړو پلاویو په یادو مراسمو کې برخه واخیسته.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
