د تېر جمهوري نظام راهیسې په جنیوا کې د افغانستان استازي، نصیر احمد اندېشه وايي، اوسمهال افغانستان ته د کډوالو د خوندي او داوطلبانه بېرته ستنېدو لپاره مناسب شرایط نه شته.
اندېشه وویل چې د افغانستان وګړي د هغو کډوالو له سترو ډلو څخه دي چې د لېږد او بیا مېشتېدو اړتیا لري، خو د هغوی لپاره د قانوني کډوالۍ لارې او د هېواد پرېښودو حق ورځ تر بلې محدودېږي.
په هغه اعلامیه کې چې د ملګرو ملتونو د کډوالۍ د چارو له ځانګړي راپور ورکوونکي سره د بحث پر مهال ولوستل شوه، اندېشه خبرداری ورکړ چې ځینې اروپايي هېوادونه د طالبانو له رژیم سره د جبري ایستلو لپاره د شکمنو معاملو او راکړې ورکړې په ترسره کولو سره د افغان کډوالو د ځنځیري اخراج خطر زیاتوي.
نوموړي په ځانګړي ډول د ښځو، نجونو او د پخوانیو امنیتي ځواکونو د غړو لپاره د بېرته ستنېدو د خورا ناوړه پایلو په اړه اندېښنه څرګنده کړه.
هغه وویل: “موږ له ټولو غړو هېوادونو غوښتنه کوو چې دا درک او ومني چې دا مهال په افغانستان کې د خوندي او داوطلبانه بېرته ستنېدو لپاره اړین شرایط شتون نه لري.”
اندېشه زیاته کړه چې د بیا مېشتېدو هغه پروګرامونه چې پخوا یې له زیانمنو قشرونو ملاتړ کاوه، اوس ځنډول شوي یا درول شوي دي، او زرګونه کسان یې په درېیمو هېوادونو کې، چې ډېری وخت د توقیف په څېر شرایط لري، سرګردانه پرېښي دي.
نصیراحمد اندېشه ټینګار وکړ چې د طالبانو تر واکمنۍ لاندې د کډوالو جبري بېرته ستنول، په ځانګړې توګه د ښځو، نجونو او هغو کسانو لپاره چې له دې رژیم سره یې مخالفت درلود، د سیستماتیک ځورونې او تعقیب خطر له ځان سره لري.
دا څرګندونې داسې مهال کېږي چې د اروپا ټولنې استازو د سېشنبې په ورځ په بروکسل کې د طالبانو له پلاوي سره لیدنه وکړه.
د اروپايي ټولنې د ۱۵ غړو هېوادونو استازو په دې غونډه کې ګډون کړی و.
د اروپا پارلمان غړې، هانا نیومن بروکسل ته د طالبانو د پلاوي سفر د افغان کډوالو په اړه د خبرو لپاره بېمعنا نمایش بللی دی.
هغې ویلي چې طالبان د تخنیکي مذاکراتو په لټه کې نه دي، بلکې د مشروعیت ترلاسه کول غواړي او په همدې کچه تعامل ته به دوام ورکړي.
خپلواکه ژورنالېزم ژوندی وساتئ
ستاسو ملاتړ موږ سره مرسته کوي چې دقیق او بېطرفه راپورونه وړاندې کړو او د هغو کسانو غږ پورته کړو چې ډېری وخت له پامه غورځول کېږي.
